Toshkent shahri Sergeli tumanida Maktabgacha ta’lim vazirligi tomonidan "Baxtli bolalik" va "Bilimlar mamlakati" deb nomlangan ikkita davlat maktabgacha ta’lim tashkilotining ochilish marosimi bo‘lib o‘tdi. Tadbirda Sputnik O‘zbekiston muxbiri ham ishtirok etdi.
Ushbu zamonaviy bog‘chalar Tumanning Qumariq hamda 5A dahasida joylashgan bo‘lib, shu paytgacha O‘zbekistonda faoliyat yuritgan bog‘chalardan tubdan farq qiladi. Ichkariga qadam qo‘yishingiz bilan, barchasi bolalar uchun, ular o‘zlarini baxtiyor his etishlari uchun puxta o‘ylanganligiga guvoh bo‘lasiz.
Yirik javonlar o‘rnini mobil modullar egallagan. O‘yin va o‘quv qurollari bolalar bo‘yi yetadigan joyda joylashgan. Guruhlar va koridorlarda nutq va yozish, bilimni rivojlantirish, ijod, qurilish, konstruksiyalash va mayetamatika, sujet o‘yinlari, kutubxona kabi ko‘plab rivojlantirish markazlari mavjud.
"Sergelida bir yo‘la ikkita MTM ochilishi yana 600 nafar bolalar sifatli maktabgacha ta’lim olish imkoniyatiga ega bo‘lishini anglatadi. Shuningdek, qisqa muddatli guruhlar ochilib, ularga 240 nafar bolalar qabul qilinadi", deya ta’kidladi ochilish marosimida nutq so‘zlagan Maktabgacha ta’lim vazirligi rahbari Agrippina Shin.
