TOShKENT, 18 sen – Sputnik. Bandlik va mehnat munosabatlari vazirining birinchi o‘rinbosari Erkin Muhitdinov Sputnik O‘zbekiston muxbirining O‘zbekiston va Rossiya o‘rtasida migratsiya afvi masalasi hal qilinmoqdami, degan savoliga javob berdi.
Erkin Muhitdinovning ma’lum qilishicha, ushbu yo‘nalishda birgalikdagi alohida ishchi komissiyasi ish olib bormoqda. Ishchi guruhga ikki davlat mehnat vazirlari rahbarlik qilmoqda.
“Bu masalani o‘tgan yilning noyabr oyidan buyon ko‘tarib kelmoqdamiz. Ishchi komissiyaning ikki yig‘ilishi bo‘lib o‘tdi. Har bir yig‘ilishda migratsiya amnistiyasi masalasini ko‘taramiz. Hozircha rossiyalik hamkasblarimiz bu masala yuzasidan javob berishmadi. Ular buni ko‘rib chiqishmoqda. Barchasi Rossiya IIV nazoratida. Joriy yilning noyabr oyida Buxoro shahrida ishchi guruhning navbatdagi yig‘ilishi bo‘lib o‘tadi. Biz bu masalani birinchilardan bo‘lib ko‘taramiz,” – dedi Erkin Muhitdinov
Eslatib o‘tamiz, avvalroq Rossiya Davlat dumasi raisi Vacheslav Volodin O‘zbekiston Oliy majlisi Senati raisi Tanzila Norboyeva bilan o‘zbekistonlik migrantlar masalasini muhokama qilgani xabar qilingan edi.
