TOShKENT, 4 sen – Sputnik. Surxondaryo viloyati bojxona boshkarmasi Boldir temir yo‘l chegara bojxona posti xodimlari tomonidan qo‘shni mamlakat hududidan yo‘lovchi poyezdida yo‘lovchi sifatida kirib kelgan fuqaro K.G. bojxona nazoratidan o‘tkazildi.
“Natijada mazkur fuqaroning qo‘l yuklari orasidan og‘zaki so‘rovda ma’lum qilinmagan va hech qanday tegishli hujjatlari bo‘lmagan 1 dona “Discovery” nomli uchuvchisiz uchish apparati borligi ma’lum bo‘ldi”, - Bojxona qo‘mitasi xabarida.
Hozirda mazkur holat yuzasidan bojxona tekshiruvlari davom ettirilmoqda.
Eslatib o‘tamiz, O‘zbekistonga dronlarni noqonuniy olib kirganlik uchun qamoq jazosi belgilangan. Jinoyat kodeksiga uchuvchisiz uchadigan apparatlarni qonunga xilof ravishda olib kirish, o‘tkazish, olish, saqlash yoki ulardan foydalanish uchun uch yilgacha ozodlikdan mahrum qilish jazosi kiritilgan.
