TOShKENT, 1 avg – Sputnik. O‘zbekiston Bosh vaziri Abdulla Aripov Qirg‘iziston prezidenti Sooronbay Jeenbekov bilan uchrashdi. Bu haqda Qirg‘iziston davlat rahbari matbuot xizmati xabar qildi.
Qayd etilishicha, uchrashuvda Qirg‘iziston va O‘zbekiston o‘rtasidagi ikki tomonlama hamkorlikni yanada rivojlantirish istiqbollari, jumladan, chegaralar, energetika, mintaqalararo va parlamentlararo hamkorlik masalalari muhokama qilindi.
Sooronbay Jeenbekov Qirg‘iziston-O‘zbekiston hamkorligini chuqurlashtirish har doim mamlakat tashqi siyosatining ustuvor yo‘nalishlaridan biri bo‘lishini ta’kidlab o‘tdi.
Qirg‘iziston rahbari barcha tegishli masalalar o‘zaro manfaatli shartlar asosida hal qilinishi zarurligini ta’kidlab, nafaqat O‘zbekiston bilan, balki ko‘p tomonlama hamkorlikni rivojlantirishdan ham manfaatdor ekanligini bildirdi.
Shuningdek, Sooronbay Jeenbekov qirg‘iz-o‘zbek chegarasini delimitatsiya qilishda tomonlarning ijobiy ishini mamnuniyat bilan qayd etdi va Qirg‘iziston va O‘zbekistonning chegaradosh mintaqalari o‘rtasidagi hamkorlikni yanada chuqurlashtirish muhimligini ta’kidladi.
Abdulla Aripov o‘z navbatida davlat rahbarlarining sa’y-harakatlari tufayli ikki mamlakat o‘rtasidagi munosabatlar sifat jihatdan yangi bosqichga ko‘tarilganini, savdo-iqtisodiy aloqalarning ijobiy sur’ati qayd etilganligini ta’kidladi.
Abdulla Aripov mamlakatlar o‘rtasida hukumat darajasida prezidentlar tomonidan belgilangan barcha masalalar, shu jumladan, Qirg‘iziston va O‘zbekiston o‘rtasidagi savdo hajmini 1 mldr dollarga yetkazish bo‘yicha ishlar olib borilayotganini ta’kidladi.
Eslatib o‘tamiz, avvalroq Abdulla Aripov Qirg‘iziston prezidenti Sooronbay Jeenbekov bilan uchrashishi haqida xabar qilgan edik.
