TOShKENT, 4-iyul – Sputnik. Bugun soat 06:33da Yakkasaroy tumani, Mirobod ko‘chasi 35-uy qarshisida yangi qurilayotgan uyning yerto‘lasida penoplast bo‘laklari 40 kv.m maydonda yongan. Bu haqda Toshkent shahar Yong‘in xavfsizligi boshqarmasi xabar berdi.
Xabarda yozilishicha, yong‘in joyiga 4 ta yong‘in o‘chirish texnikasi jalb qilingan. Yong‘in o‘chirish jangovar bo‘linmalari chaqirilgan manzilga soat 06:37da yetib borgan va ko‘rilgan tezkor chora va harakatlar natijasida yong‘in soat 06:44da bartaraf etilgan.
“Yong‘in sigareta chekishda ehtiyotsizlik oqibatida sodir bo‘lgan, deb taxmin qilinmoqda”, - deyiladi xabarda.
Hozirda yong‘indan keltirilgan moddiy zarar miqdori aniqlanmoqda.
