Fargʻona vodiysi yuragi - Namangan xorijlik investorlarga qanday taklif bera oladi?

Fargʻona vodiysining yuragi - Namangan shahrida 7-8 iyun kunlari "Doing business with Namangan - 2019" xalqaro investitsiya forumi boʻlib oʻtdi.

Namangan viloyati hududida "Namangan" va "Kosonsoy-Farm" erkin iqtisodiy hududlari va 9 ta kichik sanoat zonalari mavjud. Yaqin kelajakda esa toʻqimachilik mahsulotlari ishlab chiqarishga ixtisoslashgan uchinchi iqtisodiy zona tashkil etish rejalashtirilmoqda.

Viloyatda yirik tekstil ishlab chiqarish korxonalari mavjud. Oʻzbekistonda ishlab chiqarilgan matolarning 15 foizi Namangan viloyatiga toʻgʻri keladi. Namanganlik chevarlar tomonidan tikiladigan erkaklar kostyum-shimlarga jahon bozorida tobora talab kuchaymoqda.

Namangan viloyati xorijiy kompaniyalarga oʻz investitsion salohiyatini taqdim etdi

Namanganda yetishtirilgan yongʻoqlar va qayta ishlangan xoʻl-mevalar.

Oʻzbekistonda yilning 300 dan ortiq kuni quyoshli boʻlgani uchun mamlakat mevalari dunyodagi eng mazali va shirin, deb tan olingan. Namangan viloyatida yetishtirilgan gilos, barcha sifat sertifikatlariga ega boʻlib, bir hafta oldin ilk marotaba eksport qilindi va London supermarketlarida sotuvga chiqdi, viloyatda yetishtirilgan oʻrik esa Hindistongacha yetib bordi.

Forum arafasida Namangan viloyati hokimligi Tashqi ishlar vazirligi bilan hamkorlikda ilk bor eksportchilarni qoʻllab-quvvatlashga qaratilgan noyob "MADEINNAMANGAN.UZ" portalini ishga tushirdi. Unda Oʻzbekistondagi barcha ishlab-chiqaruvchilar katalogi mujassam.

Investitsiya forumi Namanganda anʼanaviy Gullar festivali oʻtkazilayotgan kunlarda boʻlib oʻtdi.

Viloyat turizm yoʻnalishida ham yuqori salohiyatga ega. Namanganda yirik "Axsikent" arxitektura yodgorligi merosi mavjud. Qadimda bu oʻlkada jahon ilm-faniga salmoqli hissa qoʻshgan 30 dan ortiq olimlar yetishib chiqqan va ularning bebaho merosini oʻrganish vodiyni mutlaqo yangi qiyofada jahonga tanitishi mumkin.

X-XIII asrlarda Fargʻona vodiysida Axsikent yirik shaharlardan biri boʻlib, shaharda oynachilik, kulolchilik, temirchilik hamda qurolsozlik va boshqa sohalar rivojlangan. 90 gektarga yaqin yer osti suv inshootining mavjudligi va shaharning mudofaa uchun qulay geografik oʻrinda joylashganligi Axsikent shaharsozligidagi oʻziga xos jihatlar hisoblanadi.

Forumda 40dan ziyod mamlakatlar, xususan, Hindiston, Turkiya, XXR, Rossiya, Germaniya, BAA, Frantsiya va boshqa davlatlar xorijiy kompaniyalarining 300dan ortiq vakillari ishtirok etdi. Forum ishida Oʻzbekistonda akkreditatsiya qilingan diplomatik korpus vakillari va chet el OAV muxbirlari ham qatnashdilar.

Oʻzbekiston tashqi siyosatda, xususan, jahon hamjamiyati bilan savdo-iqtisodiy, madaniy-doʻstlik aloqalarini mustahkamlash va kengaytirishga katta eʼtibor qaratmoqda. Viloyat hokimligi rasmiylari Namanganga kelishni xohlaydigan har bir investor "Xush kelibsiz!" deya kutib olinishini vaʼda qildi, demak, Fargʻona vodiysi ijobiy oʻzgarishlar va katta yoʻl boshida. Bu borada barchaga ibrat maktabi boʻladi, deb umid qilamiz.