TOShKENT, 31-may – Sputnik. “Buxoro viloyati Qorako‘l tumanida “Xalqaro matematika maktabi”ni tashkil etish to‘g‘risida” hukumat qarori loyihasi tayyorlandi.
Qaror loyihasida aytilishicha, Qorako‘l tumanidagi 1-ixtisoslashtirilgan davlat umumta’lim maktab-internatiga “Xalqaro matematika maktabi” maqomini berish to‘g‘risidagi taklifiga rozilik berish nazarda tutilgan.
Xalqaro maktabning asosiy vazifalari:
- umumiy o‘rta ta’limning davlat ta’lim standartlari asosida zamonaviy axborot texnologiyalardan keng foydalangan holda aniq va tabiiy fanlar hamda chet tillarining chuqur o‘qitilishini tashkil etish;
- o‘quvchilarning ijodiy salohiyatini namoyon qilish va faollashtirish;
- har bir o‘quvchining individual xususiyatlarini hisobga olgan holda mustaqil tadqiqotchilik faoliyati ko‘nikmalarini shakllantirish va rivojlantirish;
- yuqori kasb mahoratiga ega bo‘lgan mahalliy va xorijiy mamlakatlardan tajribali o‘qituvchilarni jalb qilish;
- iqtidor va iste’dodni aniqlash hamda kamol toptirish bo‘yicha o‘quvchilarni respublika va xalqaro fan olimpiadalari, tanlovlar va boshqa tadbirlarda qatnashishga tayyorlash;
- respublikadagi aniq va tabiiy fanlarga ixtisoslashtirilgan davlat umumta’lim maktablariga umumiy metodik yordam ko‘rsatish.
“2019-2020 o‘quv yilidan Xalqaro maktabning 7-sinfiga 90 nafar o‘quvchi qabul qilinadi”, - deyilgan hujjatda.
Qaror loyihasida yozilishicha, xalqaro maktab binosini mukammal ta’mirlash, 400 o‘rinli yotoqxona va 150 o‘rinli mehmonxona binosini qurilishi hamda jihozlash ishlarini qo‘shimcha ravishda kiritish ko‘zda tutilgan.
