TOShKENT, 28-may - Sputnik. Termizda bo‘lib o‘tgan biznes-forum doirasida O‘zbekistondan Afg‘onistonga neft-kimyo, to‘qimachilik, oziq-ovqat mahsulotlari hamda qurilish materiallarini yetkazib berish bo‘yicha bir qator eksport kelishuvlariga erishildi va shartnomalar imzolandi. Bu haqda O‘zbekiston Investitsiya va tashqi savdo vazirligi matbuot xizmati xabar qildi.
Forumda 60 dan ortiq Afg‘oniston kompaniyalarining vakillari ishtirok etdi. Xorijiy delegatsiyaga Afg‘oniston Sanoat va savdo vazirining o‘rinbosari M. Yurish rahbarlik qildi.
Chet ellik mehmonlar 18 ta sohada, xususan, to‘qimachilik, teri va poyabzal, farmatsevtika, neft-kimyo, metallurgiya va elektrotexnika mahsulotlari, qurilish materiallari hamda boshqa mahsulotlarning keng turlari namoyish etilgan eksportga mo‘ljallangan mahsulotlar ko‘rgazmasida O‘zbekistonning sanoat salohiyati bilan tanishish imkoniyatiga ega bo‘lishdi.
Bundan tashqari, biznes-forum doirasida “O‘zbekiston-Afg‘oniston” chegara savdo zonasi tomonidan yaratilgan imkoniyatlardan to‘liq foydalanish hisobiga o‘zaro savdo hajmini tez sur’atlarda rivojlantirish istiqbollarini muhokama qilish maqsadida Afg‘oniston delegatsiyasi bilan ikki tomonlama muzokaralar bo‘lib o‘tdi.
