TOShKENT, 15-may – Sputnik. Toshkentdagi “Fayzobod” avtodromining qiyofasi tez orada o‘zgaradi. Bu haqda Toshkent shahar IIBB matbuot xizmati xabar qilmoqda.
IIBB xabariga ko‘ra, bu masala bir qancha vaqtdan beri ularni o‘ylantirib kelmoqda.
Bugungi kunda meyoriy-huquqiy hujjatlarga muvofiq bo‘lmagan ushbu bino va avtodromni to‘liq ta’mirdan o‘tkazish zarurati yuzaga kelgan.
Shu munosabat bilan Toshkent shahar IIBB rahbariyati respublika Ichki ishlar vazirligiga xodimlar va bo‘lajak haydovchilar uchun qulay sharoit yaratish maqsadida yangi bino qurilishi va avtodromni ta’mirdan o‘tkazishga mablag‘ ajratishni so‘rab murojaat qilgan.
Murojaat ko‘rib chiqilgunga qadar vaqtinchalik chora sifatida YHXB xodimlari tomonidan YHXB “Fayzobod” RO‘ va IOB mashq maydoni hududidagi yo‘l qatlamini ma’lum qismini ta’mirdan o‘tkazish chorasi ko‘rildi.
Eslatib o‘tamiz, Mirobod tumani, Fayzobod ko‘chasi, 43 manzilida joylashgan va Bektemir, Yashnobod hamda Shayxontoxur tumanlariga xizmat ko‘rsatuvchi Toshkent shahar IIBB YHXB Ro‘yxatdan o‘tkazish va imtihon olish bo‘limi binosi 1978-yili qurilgan.
