TOShKENT, 11-may – Sputnik. Adliya vazirligi fuqarolarning mulk huquqini himoya qiladi, deb xabar qilmoqda “Huquqiy axborot” telegram kanali.
“Adliya vazirligi joriy yilning 10-maydan — 30-iyun kuniga qadar fuqarolarning ko‘chmas mulkka bo‘lgan huquqlariga rioya etilishi yuzasidan onlayn murojaatlarni qabul qilish va hal etish bo‘yicha AKSIYa e’lon qiladi”, - deyilgan xabarda.
Vazirlik, xususan, quyidagi holatlar yuzasidan, onlayn arznomalar qabul qilishni boshladi:
- Ko‘chmas mulk huquqi buzilishi;
- Turar joy noqonuniy buzilishi;
- Buzilgan imorat uchun kompensatsiya to‘lanmasligi;
- Qoniqarsiz kompensatsiya taklif etilishi;
- Ko‘chmas mulkka egalik huquqi berilmasligi.
Yuqorida qayd etilgan qonunbuzarliklarga barham berish vaqti keldi, deyilgan xabarda.
Ko‘chmas mulk sohasida buzilgan huquqlarini tiklash uchun fuqarolar ushbu havola orqali murojaat etishlari mumkin.
