TOShKENT, 19 apr – Sputnik. Jizzax viloyatida “Damas” va yuk avtomashinasi to‘qnashuvi oqibatida ikki kishi halok bo‘ldi.
O‘zbekiston IIV Jamoatchilik va ommaviy axborot vositalari bilan aloqalar boshqarmasining xabar qilishicha, Jizzax viloyatining Sh.Rashidov tumanida 18-aprel kuni fuqaro boshqaruvidagi “Damas” rusumli avtomashinani “Toshkent-Termiz” yo‘lining 971-km.da haydab ketayotgan vaqtda yo‘l chetida to‘xtab turgan fuqaro boshqaruvidagi “Isuzu” rusumli yuk avtomashinasining orqa qismiga urilib to‘qnashuv sodir etgan.
“Natijada “Damas” avtomashinasi haydovchisi N.N. va uning yo‘lovchisi 25 yoshli A.B.lar jarohat olib voqea joyida vafot etganlar”, - deyiladi xabarda.
Holat yuzasidan jinoyat ishi qo‘zg‘atilgan.
Hozirda tergov harakatlari olib borilmoqda.
