TOShKENT, 9 apr – Sputnik. Saudiya Arabistoni fuqarosi O‘zbekistonga noquniy ravishda ikkita lochin va qushlarni ovlash uchun tuzoqlarni olib kirishga harakat qildi. Bu haqda Ekologiya va atrof muhitni muhofaza qilish davlat qo‘mitasi xabar qildi.
Ekologiya qo‘mitasi xodimlari Toshkent xalqaro aeroporti bojxona xizmatchilari bilan birgalikda Dubaydan uchib kelgan Saudiya Arabistoni fuqarosi tomonidan ikkita lochin olib kirish holatini oldini olishdi.
Lochinlar bilan birga xorijiy fuqaro yirtqich qushlarni ovlash bo‘yicha tuzoqlar olib kirmoqchi bo‘ldi.
“Qushlarni respublika hududiga olib kirish maqsadi - lochin ovini amalga oshirish bo‘lgan”, - deyilgan xabarda.
Qushlar vaqtincha maxsus qushxonaga berildi.
“Xorijiy fuqaroni qonun hujjatlarda belgilangan tartibda javobgarlikka tortish masalasi ko‘rib chiqilmoqda”, - deyilgan xabarda.
