TOShKENT, 1 apr – Sputnik. Samarqandda jiyanini tarbiyalab qo‘ymoqchi bo‘lgan aka-uka uning umriga zomin bo‘ldi.
O‘zbekiston IIV Jamoatchilik va OAV bilan aloqalar boshqarmasining xabar qilishicha, 29-mart kuni Navoiy viloyati yashovchi fuqarolar Samarqand viloyatining Kattaqo‘rg‘on tumani Ko‘mir qishlog‘ida yashovchi opasining uyiga kelishadi.
“U yerda aka-ukalar voyaga yetmagan jiyani B.A.ni tarbiyalash maqsadida tanasining turli joylariga tayoq bilan urib, jarohat yetkazganlar. Oqibatda bolaning sog‘lig‘i yomonlashganligi sababli uni boshqa xonaga olib chiqib, yotqizib qo‘yganlar”, - deyiladi xabarda.
Natijada voyaga yetmagan fuqaro olgan tan jarohatlaridan voqea joyida vafot etgan.
Holat yuzasidan jinoyat ishi qo‘zg‘atilib, aka-ukalar ushlanganlar. Tergov harakatlari olib borilmoqda.
