TOShKENT, 7 mar - Sputnik. 2019 yil 6-mart kuni Farg‘ona viloyatining Qo‘qon shahrida yashovchi Yorqinjon Omonboyev IIBga murojaat qilib, shu yil 4-mart kuni birga yashovchi o‘g‘li 22 yoshli Jasurbek Daminov boshqaruvidagi davlat raqami 40 U 050 QA bo‘lgan “Lasetti” rusumli avtomashinasida uyidan noma’lum tomonga chiqib ketib, bedarak yo‘qolganligini ma’lum qilgan.
O‘zbekiston IIV Jamoatchilik va ommaviy axborot vositalari bilan aloqalar boshqarmasining ma’lum qilishicha, olib borilgan qidiruv ishlari natijasida avtomashina Qo‘qon shahar, Charxiy ko‘chasi 2-uy oldida joylashgan avtomashinalarni yuvish shoxobchasidan texnik soz holda topilgan.
Qayd etilishicha, J.D.ni qidirib topish choralari ham ko‘rilgan. Surishtiruv ishlari olib borilmoqda.
Ushbu shaxs va avtomashina haqida biron bir ma’lumotga ega bo‘lganlardan ichki ishlar organlariga xabar berishlari so‘ralgan.
