TOShKENT, 4 dek – Sputnik. Kecha, 3-dekabrdan boshlab “Toshkent – Xiva” yo‘nalishida elektropoyezd qatnovi yo‘lga qo‘yildi, deb xabar qilmoqda O‘zA.
Ushbu yo‘nalishda barcha qulayliklarga ega bo‘lgan birinchi poyezd Toshkentning Janubiy vokzalidan yo‘lga chiqdi. Kelajakda ushbu yo‘nalishda tezurar “Afrosiyob” poyezdlari qatnovini yo‘lga qo‘yish ham rejalashtirilgan.
Eslatib o‘tamiz, O‘zbekiston prezidenti Shavkat Mirziyoyev o‘tgan haftada Xorazm viloyatiga bo‘lgan tashrifi chog‘ida “Xiva” temir yo‘l vokzalining yangi binosi va bu yerda yo‘lovchilar uchun yaratilgan sharoitlar bilan tanishgan edi.
Xiva vokzali binosi Xorazm me’morchiligi uslubida qurilgan bo‘lib, u yerda zamonaviy VIP zal, ona va bola xonasi hamda tibbiyot xonsi hamda 20 o‘rinli mehmonxona mavjud. Vokzalda 35 ishchi bir vaqtning o‘zida 200 yo‘lovchiga xizmat ko‘rsatadi.
