TOShKENT, 3 okt – Sputnik. Aqto‘be viloyatidagi trassada avtobus yong‘ini vaqtida tiriklayin yongan 52 nafar o‘zbekistonlikning qarindoshlari har bir sudlanuvchidan yetkazilgan ma’naviy zarar uchun 150 million tangadan talab qilishdi. Sputnik Qozog‘iston xabariga asosan.
O‘zbekistonliklarning qarindoshlari talab qilgan umumiy summa 7 milliard 800 million tangani (21 million dollardan ortiqni) tashkil qiladi.
Eslatib o‘tamiz, fojia joriy yilning 18-yanvarida Samara-Shimkent trassasining 1068 kilometrida yuz bergan. Kassbohrer Setra rusumli yo‘lovchi avtobusi salonida o‘sha vaqtda 55 yo‘lovchi - O‘zbekiston fuqarolari va uch nafar qozog‘istonlik haydovchilar bo‘lishgan.
Yo‘lovchilarning bir nechtasi alanga olgan avtobus ichidan sakrab chiqishga muvaffaq bo‘lgan, qolganlari tiriklay yongan.
Avtobus salonidagi temperatura shu darajada yuqori bo‘lganki, ayrim jasadlardan faqat kul qolgan, xolos. Avtobusda yongan 16 kishi O‘zbekistonning Farg‘ona viloyatidan bo‘lgan.
Avtobus haydovchilari o‘zlariga qo‘yilgan aybni tan olmayapti va ularni qo‘yib yuborishlarini talab qilishmoqda.
