TOShKENT, 26 sen - Sputnik. O‘zbekiston prezidenti Shavkat Mirziyoyev 2018-yil 27-28 sentabr kunlari Mustaqil Davlatlar Hamdo‘stligi rahbarlari kengashining Dushanbe shahrida bo‘lib o‘tadigan navbatdagi majlisida ishtirok etadi, deb xabar qildi O‘zbekiston TIV matbuot-xizmati o‘zining rasmiy sahifasida.
Sammit kun tartibidan turli sohalardagi ko‘p qirrali hamkorlikni yanada rivojlantirishning joriy holati va istiqbollariga doir keng ko‘lamli masalalar o‘rin olgan.
Shuningdek, davlat rahbarlari 2019-yilda MDHga raislik qiladigan davlatni, MDH Davlat rahbarlari kengashining navbatdagi majlisini o‘tkazish joyi va muddatini belgilash masalasini ko‘rib chiqadi, mintaqaviy va xalqaro siyosatning dolzarb muammolari yuzasidan fikr almashadi.
Majlis yakunida qator salmoqli hujjatlar, jumladan, MDHga a’zo mamlakatlar davlat rahbarlarining 1948-yil 10-dekabrdagi Inson huquqlari umumjahon deklaratsiyasi qabul qilinganining 70-yilligi munosabati bilan bayonoti, 1941-1945 yillardagi Ulug‘ Vatan urushida qozonilgan G‘alabaning 75-yilligiga tayyorgarlik ko‘rish va uni nishonlash bo‘yicha asosiy tadbirlar rejasi, 2019-2023 yillarga mo‘ljallangan jinoyatchilikka qarshi kurashish bo‘yicha hamkorlikdagi sa’y-harakatlar davlatlararo dasturi, Axborot texnologiyalari sohasidagi jinoyatlarga qarshi kurashish bo‘yicha hamkorlik to‘g‘risidagi bitim imzolanishi kutilmoqda.
O‘zbekiston prezidentining tashrifi doirasida Dushanbe shahrida ikki tomonlama qator uchrashuvlar o‘tkazish ham ko‘zda tutilgan.
