TOShKENT, 1 sen - Sputnik. O‘zbekiston prezidenti Shavkat Mirziyoyev tomonidan "El-yurt hurmati" ordeni bilan mukofotlangan milliarder Alisher Usmonov ushbu kun uning hayotida "ulug‘ va hayajonli" bo‘lishini ta’kidladi, deb xabar qildi Sputnik O‘zbekiston muxbiri.
O‘zbekiston prezidenti Shavkat Mirziyoyev mamlakatda yirik investitsion loyihalarni muvaffaqiyatli amalga oshirish ishlariga qo‘shgan katta hissasi uchun Alisher Usmonovning ko‘ksiga "El-yurt hurmati" ordenini taqib qo‘ygach, biznesmen minbarga chiqib, minnatdorlik nutqini so‘zladi.
Xususan, Usmonov, O‘zbekiston rahbari tomonidan yuksak nishon bilan taqdirlagan bu kun uning hayotida "ulug‘ va hayajonli kun bo‘lishini" qayd etdi. Biznesmen bunday hayajonli kunda "rahmat" aytish uchun kerakli so‘zlarni topishga ojiz qolayotganini tan oldi.
"...Shuncha qiyinchilik, armon va umidlar bugun yuzaga chiqayapti mening hayotimda... Faqat mening hayotimda emas, butun o‘zbek xalqining umidi sizning qo‘lingizga topshirilgan. Albatta, har bitta o‘zbek o‘g‘lonining majburiyati bugun yoningizda turib, qo‘lidan kelganicha va balki qo‘lidan kelganidan ko‘p yoningizda bo‘lish", - dedi u Mirziyoyevga murojaat qilib.
Usmonov bu yo‘l judayam qiyin bo‘lishini, osonlikni hech kim bugun bermasligini ta’kidlab o‘tdi.
"Mening ishonchim komilki, butun xalq shundoq rahbarni boshchiligida albatta, shu rejalarga yetadi. Va men o‘zim uchun shu rejalarga yetish uchun qilingan har bir harakatimni hayotimning mazmuni deb bilmoqchiman", - dedi biznesmen.
Shundan so‘ng Usmonov O‘zbekiston prezidentiga o‘z minnatdorligini bildirgan holda, unga salomatlik hamda kuch tiladi.
Alisher Usmonov o‘z nutqini "xalqimizga tinchlik, farovon hayot va iqtisodiy boylik tilayman", degan so‘zlar bilan yakunladi.
