TOShKENT, 9-iyul — Sputnik. Tijorat banklarida jismoniy shaxslar bilan valyuta ayirboshlash operatsiyalarini amalga oshirish tartibi to‘g‘risidagi nizom Adliya vazirligi tomonidan davlat ro‘yxatdan o‘tkazildi. Bu haqda Adliya vazirligining "Huquqiy axborot" kanali xabar qildi.
Nizom bilan rezident jismoniy shaxslarga tijorat bankining maxsus dasturidan foydalangan holda chet el valyutasini sotib olish, sotish va qonun hujjatlariga muvofiq boshqa operatsiyalarni amalga oshirish imkoniyati berilmoqda.
Bunda rezident jismoniy shaxslar maxsus dasturni kompyuter qurilmasiga (shu jumladan, planshet, mobil telefon va boshqa qurilmalar) yuklab oladi hamda undan foydalanadi.
Tijorat bankining maxsus dasturdan foydalangan holda valyuta ayirboshlash operatsiyalarini amalga oshirishlari uchun jismoniy shaxs nomiga bank kartasi va xalqaro to‘lov kartasi ochilgan bo‘lishi lozim.
Eslatib o‘tamiz, O‘zbekiston aholisi 1-apreldan boshlab bank kartalarining valyuta hisob raqamlarida bo‘lgan valyuta mablag‘larini naqd ko‘rinishda olishga ruxsat berilgandi.
Bir kunda yechib olish mumkin bo‘lgan valyuta miqdori tijorat banklari tomonidan belgilanadi.
