TOShKENT, 27-iyun — Sputnik. AQSh prezidentining milliy xavfsizlik bo‘yicha maslahatchisi Jon Bolton chorshanba kuni Moskvada Rossiya TIV rahbari Sergey Lavrov bilan muzokaralar o‘tkazadi, deb xabar berdi RIA Novosti.
Iyun oyining o‘rtalarida, Tramp o‘z intervyularining birida yaqin vaqtda Putin bilan uchrashishi mumkinligiga umid bildirgach, Moskva va Vashington o‘rtasidagi oliy darajadagi uchrashuvlarni tashkil etish bo‘yicha aloqalar sezilarli faollashuv qayd etilgan edi. Shundan so‘ng Times nashri AQSh ma’muriyatidagi mansabdorlar ikki yetakchi uchrashuvi iyul oyida, NATO sammitidan oldin yoki undan keyin bo‘lib o‘tishini mo‘ljallashayotgani haqida xabar qilgan edi.
Moskvada hozircha oliy darajadagi uchrashuvga tayyorgarlik jarayonini tasdiqlashgani va inkor etishgani ham yo‘q. Rossiya prezidenti matbuot-kotibi Dmitriy Peskov jurnalistlar bilan suhbatda Bolton chorshanba kuni Kremlda qabul qilinadimi degan savolga ochiq javob bermadi, agar Putin u bilan uchrashsa "biz sizlarga xabar beramiz", — deyish bilan kifoyalandi.
Hamkasblari orasida "Qirg‘iy" deya nom qozongan konservator Jon Bolton hurpaygan mo‘ylovga ega va ular, mish-mishlarga qaraganda Donald Trampga yoqmaydi. Bolton aprel oyida AQSh prezidentining milliy xavfsizlik bo‘yicha maslahatchisi lavozimiga tayinlangan.
AQSh Davlat kotibining sobiq o‘rinbosari Bolton murosasiz noyekonservator dovrug‘ini qozongan. U hamisha KXDRga nisbatan ham Eronga nisbatan ham keskin va qat’iyatli bo‘lib kelgan.
