TOSHKENT, 31 may – Sputnik. Oʻzbekiston Respublikasining sobiq bosh prokurori Rashidjon Qodirov xalq tilida “Sangorod” deb ataladigan mahbuslar davolanadigan shifoxonada davolanmoqda. Bu haqdagi xabarni “Xabar.uz”ning ichki ishlar vazirligi tizimidagi manbasi tasdiqladi.
Maʼlum boʻlishicha, Rashidjon Qodirov taxminan ikki hafta oldin qon bosimidan aziyat chekib, “Sangorod”ga yotqizilgan. Hozirgi paytda uning ahvoli barqaror ekani aytilmoqda.
Shu yilning 22 fevralida hibsga olingan Qodirov Bosh prokuratura rasmiy xabariga koʻra, tovlamachilik, hokimiyat yoki mansab vakolatini suiisteʼmol qilish va pora olish moddalari boʻyicha ayblanmoqda.
