TOShKENT, 17 fev — Sputnik. "O‘zbekiston havo yo‘llari" Milliy aviakompaniyasi bahor-yoz mavsumida yangi yo‘nalishlar ochish bilan bir qatorda amalga oshirilayotgan parvozlar sonini ham ko‘paytirishni rejalashtirmoqda.
MAK matbuot xizmatining xabar berishicha, joriy yilning 24-mayidan boshlab, aviakompaniya haftasiga bir marta Barselonaga (Ispaniya) parvozlarni bajarishni boshlaydi. Shuningdek, bahor-yoz jadvalida Mumbayga (Hindiston) ham muntazam qatnovlarni yo‘lga qo‘yish rejalashtirilgan.
Aviakompaniya tomonidan amalga oshirilayotgan qatnovlar soni ham ortadi. Nyu-Yorkka parvozlar haftasiga uch marta, Istanbulga 10-marta, Seulga 4-marta va Novosibirskka uch marta bajariladi.
Bugungi kunda "O‘zbekiston havo yo‘llari" Milliy aviakompaniyasi Yevropa va Osiyoning 40 dan ziyod shaharlariga muntazam qatnovlarni amalga oshirmoqda.
