TOShKENT, 31 dek — Sputnik. Lola Karimova — Tillayeva Instagram shaxsiy sahifasida o‘zining yangi yil tabrigini e’lon qildi.
"Men ushbu yilni yuragimda muhabbat va barcha kunlar uchun shukronalik hissi ila yakunlayapman. Kirib kelayotgan 2018-yilda siz va oila a’zolaringizga sihat-salomatlik, tinchlik, mehr-muhabbat hamda ishlaringizda ravnaqlar tilab qolaman. Istardimki, har bir xonadonda qut-baraka va har bir inson qalbida tinchlik, hotirjamlik hukm sursin; odamlar hayotga tinch va ishonch nazari bilan qarasinlar.
Uy, ishxona va ko‘chalarda, bir birimizga ko‘proq xayrixoq bo‘laylik. Rivojlanish, ishlash, yaratish g‘oyalariga to‘la bo‘lgan insonlar, ushbu orzu va rejalarini amalga oshirish uchun imkoniyatlarga ega bo‘lsinlar. Yer yuzidagi barcha bolajonlar to‘q, sog‘lom va baxtli bo‘lib yursinlar. Bugungi kunday quyoshli kunlar ko‘proq bo‘laversin hamda barcha insonlar yaxshilik va ezgulikka ishonsinlar", deb yozgan Lola Karimova.
