TOShKENT, 5 dek — Sputnik. O‘zbekistonga rasmiy tashrif bilan kelgan Afg‘oniston Prezidenti Muhammad Ashraf G‘ani 5-dekabr kuni Abdulla Aripov hamrohligida Mustaqillik maydoniga tashrif buyurdi.
Oliy martabali mehmon Mustaqillik va ezgulik monumenti poyiga gul qo‘ydi. Afg‘oniston Prezidenti Mustaqillik maydonining o‘ziga xos manzarasi, chuqur mazmun-mohiyatiga yuqori baho berdi.
Shundan so‘ng Ashraf G‘ani Hazrati Imom majumasiga tashrif buyurdi. Tashrif davomida oliy martabali mehmonga majmua tarixi haqida ma’lumot berildi.
Afg‘oniston Prezidenti majmuada saqlanayotgan Usmon mushafi va boshqa tarixiy-ma’rifiy yodgorliklarni katta qiziqish bilan tomosha qildi.
Ashraf G‘ani O‘zbekiston prezidenti Shavkat Mirziyoyev tomonidan islom dinini o‘rganish, uning asl insonparvarlik mohiyatini targ‘ib etish borasida olib borilayotgan ishlarga yuksak baho berdi.
