O‘zbekiston va Rossiya IIVlari jinoyatchilikka qarshi birgalikda kurashadi

TOShKENT, 13 noya — Sputnik. O‘zbekiston Respublikasi Ichki ishlar vaziri general-mayor Po‘lat Bobojonov Moskvada rossiyalik hamkasbi politsiya generali Vladimir Kolokolsev bilan uchrashuv o‘tkazdi, deb xabar qildi O‘zbekiston Hukumat portali.

O‘zbekiston Respublikasi IIV rahbarining rasmiy tashrifi Rossiya huquq idorasining kasbiy bayrami kuniga to‘g‘ri keldi. Rossiya Federatsiyasi IIVda bo‘lib o‘tgan muzokara chog‘ida, general-mayor Bobojonov Rossiya ichki ishlar vaziri Kolokolsevni va vazirlikning barcha shaxsiy tarkibini Ichki ishlar organlari xodimlari kuni va sovet militsiyasi tashkil topganining 100-yilligi bilan qutladi va bayramga bag‘ishlangan tantanali tadbirga taklifi uchun minnatdorchilik bildirdi.

Bobojonov ikki mamlakat vazirliklari o‘rtasida to‘liq hajmda erishilgan o‘zaro ishonchni so‘zsiz qo‘llab-quvvatlashga rossiyalik hamkasblarni ishontirgan holda, hamkorlikdagi O‘zbek-rossiya idoralararo Muvofiqlashtiruvchi ishchi guruhining faoliyatini shaxsan monitoring qilishga va’da berdi.

Shuningdek, O‘zbekiston ichki ishlar vaziri, ular rahbarliklaridagi tashkilotlarning jinoyatchilik, ayniqsa, terrorizm, narkotik vositalarning noqonuniy aylanishi, odam savdosi kabi transmilliy jinoyat turlariga qarshi birgalikda kurashishni kuchaytirish maqsadida, tezkor ma’lumotlar almashinuvini oshirishga yo‘naltirilishini ta’kidladi.

Bobojonov o‘z nutqida, aynan 2017-yilda mamlakatlar huquq tartibot idoralari o‘rtasida ikki tomonlama o‘zaro hamkorlik yangi rivojlanishga turtki bo‘lganligini ta’kidladi.

Transmilliy jinoyatchilik va noqonuniy migratsiyaga qarshi harakatlar yuzasidan o‘zaro manfaatli hamkorlikning mustahkamlanishi va kengayishi 2017-2018 yillarga mo‘ljallangan O‘zbekiston va Rossiya ichki ishlar vazirliklari o‘rtasidagi hamkorlik harakatlari Bayonini imzolashga asos bo‘ldi. Eslatib o‘tamiz, ushbu hujjatni imzolash joriy yilning may oyida V.Kolokolsev boshchiligidagi Rossiya IIV delegatsiya a’zolarining tashrifi doirasida bo‘lib o‘tgan. Bunda ikki mamlakat vazirligi rahbarlari O‘zbekiston IIVda Rossiya IIV vakolatxonasini hamda noqonuniy migratsiyaga qarshi kurashish va mehnat migratsiyasi masalalarini hal qilish yuzasidan O‘zbek-Rossiya ishchi guruhini tashkil etish zarurligini muhokama qilgan edilar.

O‘zaro ishonch va hamjihatlik ruhida o‘tgan muloqot chog‘ida, ikki mamlakat huquq-tartibot idoralari rahbarlari kelgusidagi hamkorlik yuzasidan boshqa masalalarni ham muhokama qildilar.