TOShKENT, 9 noya – Sputnik. Checheniston prezidenti Ramzan Qodirov Suriyadan Chechenistonga olib kelinadigan 44 nafar ayol va bolalardan iborat guruh ichida Rossiya, O‘zbekiston va Qozog‘iston fuqarolari borligini ma’lum qildi.
"Suriyadagi lagerlarda yashayotgan 44 nafar ayol va bolalarning shaxsini aniqlashga muvaffaq bo‘ldik. Ular orasida to‘qqiz nafar bola va ikki ayol O‘zbekiston va Qozog‘iston fuqarolari. O‘zbekistonlik va qozog‘istonlik ayol va bolalar haqida xabar topgach, Ziyod Muhammedovichga (Chechenistonning Rossiya prezidenti huzuridagi vakili) ularni zudlik bilan olib kelish topshirig‘ini berdim. Agar hozir shunday qilinmasa, ular yillar davomida o‘sha yerda azoblar ichida qolishadi. Ularga nisbatan qarorni o‘z mamlakatlari chiqargani ma’qul. Har qanday holatda ham bolalar qarindoshlari yaqinida bo‘lishadi.
Yaqin orada, aniqrog‘i, kelasi hafta boshlarida 44 kishidan iborat bu guruh Grozniyga olib kelinadi. Bu insonlar taqdirida biz iblis davlatining g‘ayriinsoniy harakatlari turli mamlakatlarning minglab fuqarolari hayotini fojiaga aylantirganini ko‘rib turibmiz. Islom dushmanlari vasvasasiga uchgan yoshlar bomba va snaradlar ostida halok bo‘lishdi va o‘z oilalari hayotini zaharga aylantirishdi"deb yozadi Qodirov Instagramdagi sahifasida.
