TOShKENT, 18 okt — Sputnik. Checheniston rahbari Ramzan Qodirov kelasi yil buxorolik Buka Umayevani Grozniyga olib kelishga va’da berdi deb xabar qilmoqda Sputnik muxbiri.
Eslatib o‘tamiz Ramzan Qodirov 17-oktabr kunlari Samarqand va Buxoro yodgorliklarini va ziyoratgohlarini tomosha qildi.
"Buxoroda kutilmaganda mening yonimga keksa ayol Buka Umayeva keldi. U O‘zbekistonda 50-yillardan buyon yashar ekan. Genotsid yillari Chechenistondan quvilgan ekan. Meni yonimga kelib quchoqlab oldi, minnatdorlik bildirdi. Men buni kutmagan edim. Men uchun ko‘pni ko‘rgan qariyalarning munosabati juda qadrli. U ayol men otam ta’lim olgan Buxoro madrasasiga borayotganimni eshitib ataylab, meni ko‘rish uchun shu yerga kelgan ekan. Biz uzoq gaplasha olmadik", — deb yozgan ushbu uchrashuv haqida Qodirov o‘zining Telegram kanalida.
Keksa ayol Qodirov bilan Chechenistonda uchrashishni istagan ekan.
"Kelasi yil yozda, u kishi tayyor bo‘lishi bilanoq, albatta Chechenistonga olib kelaman. Axir biz aynan o‘z ota-onamizning o‘z yeriga, o‘z xalqiga bo‘lgan mehri tufayli hayotga kelganmiz", — dedi Ramzan Qodirov.
Samarqand va Buxoroning tarixiy yodgorliklari Ramzan Qodirovda ulkan taasurot qoldirdi.
"Men dunyoning turli burchaklariga doimiy ravishda sayohat qilib yuradigan, lekin Toshkent, Samarqand va Buxoroda bo‘lmagan odamlarni tushunmayman. Bu hudud asrlar davomida dunyo sivilizatsiyasining qudratli markazlaridan biri bo‘lgan. Ushbu o‘lkaning o‘tgan zamondagi ulkan kuchi va qudrati haqida guvohlik beruvchi ko‘p sonili tarixiy me’morlik yodgorliklari insonni hayratga soladi", — deb yozgan Qodirov o‘z Instagram sahifasida.
Checheniston rahbari Samarqandda Shohi Zinda va Go‘r Amir va Xo‘ja Doniyor maqbaralarida bo‘ldi.
