TOShKENT, 17 avg — Sputnik. Tojikiston mehnat, migratsiya va bandlik vazirligi 2018-yilga kelib Rossiya hududida mehnat qilayotgan fuqarolari uchun nafaqa ta’minoti haqida kelishuvga erishmoqchi. Bu haqda Sputnik Tojikiston xabar qildi.
"Shu yil yakuniga qadar bu masalaga nuqta qo‘ymoqchimiz va yakuniy bitim loyihasini tayyorlamoqchimiz. Bu hujjat imzolanishi Tojikiston mehnat migrantlariga Rossiyada nafaqa olish imkoniyatini beradi", — dedi Tojikiston mehnat vazirligi vakili.
Tojikiston mehnat vazirligi vakilining so‘zlariga ko‘ra, nafaqaga olishga faqatgina Rossiyada qonuniy asosda, barcha soliqlarni to‘layotgan va ijtimoiy sug‘urtaga ega bo‘lgan migrantlar umid qilishi mumkin.
Shuningdek, ushbu bitim tasdiqlanishi Rossiya iqtisodiyotiga ijobiy ta’sir qiladi. Jumladan, mamlakatning ijtimoiy fondlarga to‘lovlar tushumi ortadi. Shu bilan birga, tojikistonlik migrantlarda qonuniy ishlashga yanada qiziqish uyg‘otadi.
Rasmiy ma’lumotlarga ko‘ra, Rossiyada 800 ming tojikistonlik mehnat migrantlari ishlamoqda. Tadqiqotchilarning qayd etishlaricha, Rossiyada ishlayotgan mehnat migrantlari orasida eng kam pulga ishlovchilar tojikistonliklar ekan. Qonuniy asosda ishga joylashgan tojikistonliklar oyiga o‘rtacha 28 ming rubl topishadi.
