TOShKENT, 14 avg — Sputnik. Markaziy bank matbuot xizmati O‘zbekistonda 50000 so‘mlik qog‘oz pul muomalaga chiqarilishi haqida xabar qildi.
Xabarda aytilishicha, 2017-yil 22-avgustidan boshlab O‘zbekiston Markaziy banki qiymati 50000 so‘mlik banknotalarni muomalaga chiqaradi.
Yangi 50000 so‘mlik banknota o‘lchami 144 x 78 mm bo‘lib bir necha himoya belgilariga ega.
Banknotning o‘ng tarafidagi keng oq rangli sathda O‘zbekiston Gerbi va "50000" raqami tasvirlangan suv belgisi mavjud.
Oq rangli sathning chap tarafidan qog‘oz qatlamida "Darcha" va "3D" effektli yuzaga chiqib, ichkariga botuvchi eni 4 mm. bo‘lgan himoya ipi o‘tkazilgan.
Banknotning markazida "ANJUMANLAR SAROYI" me’moriy binosi tasvirlangan.
Muomalaga chiqarilayotgan qiymati 50000 so‘m bo‘lgan pul belgilari, ayni paytda muomalada bo‘lgan pul belgilari va tangalar bilan bir qatorda, barcha xo‘jalik yurituvchi subyektlar va aholi tomonidan o‘z qiymati bo‘yicha barcha turdagi to‘lovlar uchun hech qanday cheklovlarsiz qabul qilinishi shart.
