TOShKENT, 5-avgust — Sputnik. Hindistonning yirik oliy o‘quv muassasalaridan biri bo‘lgan Jamiya Milliya Islamiya universitetida o‘zbek tili va madaniyati xonasi tashkil etildi. Bu haqda “Jahon” AA xabar qilmoqda.
O‘zbek tili va madaniyati xonasi O‘zbekistonning qadimiy ma’naviy-madaniy boyliklari va mamlakatning bugungi qiyofasini aks ettiruvchi xalq amaliy san’ati buyumlari, fotosuratlar bilan jihozlangan.
Shu bilan birga universitet talabalariga O‘zbekiston tarixi, madaniyati, urf-odat va an’analarini yaqindan o‘rganish imkonini beruvchi o‘zbek tilidagi kitoblar, risolalar, jurnallar ham joylashtirilgan.
Universitetning o‘zbek tili o‘qituvchisi, professor Shahid Taslimning aytishicha, mazkur o‘quv muassasasi Hindistondagi o‘zbek tili o‘qitiladigan yagona oliygohdir. Uning ma’lumot berishicha, bu yil o‘zbek tili kurslarida o‘qish uchun 30ga yaqin talaba ro‘yxatdan o‘tgan.
