TOShKENT, 4 avg — Sputnik. Qashqadaryoda 4 yashar bola uchinchi qavatdan tushmoqchi bo‘ldi, baxtsiz hodisaning oldin olindi deb xabar berdi O‘zbekiston Favqulodda vaziyatlar vazirligi matbuot-xizmati.
Xabarda aytilishicha, 2017-yilning 1-avgust kuni kech soat 21:00da Qashqadaryo viloyati Favqulodda vaziyatlar boshqarmasining tezkor navbatchi guruhiga ma’lumot kelib tushgan. Ma’lum bo‘lishicha Qarshi shahrida 2013-yilda tug‘ilgan bolakay uyning derazasini ochib, uchinchi qavatdan pastga tushmoqchi bo‘lgan. Bu haqda qo‘shnilari tomonidan xabar berilgan.
Olingan tezkor xabar bo‘yicha, mas’ul navbatchi guruhi zudlik bilan (10 daqiqa ichida) voqea joyiga yetib borib, bolani maxsus tog‘ anjomlari yordamida bolani qutqarib qolishga muvaffaq bo‘lishgan.
Aniqlik kiritilishicha, FVV xodimlari bolani 5 qavatli uyning qo‘shni xonadoni orqali 3-qavatga tushib, bola yashaydigan xonadonning ochiq oynasi orqali pastga olib tushib qutqarib qolishgan.
Qutqaruvchilarning tezkor harakati natijasida sodir bo‘lishi mumkin bo‘lgan baxtsiz hodisaning oldi olingan.
Xabarga ko‘ra, FVV xodimlari qarovsiz qoldirilgan bolaning ota-onasi bilan bog‘lana olmagach, uni sog‘-salomat IIB xodimlariga topshirishgan.
