TOShKENT, 23 apr – Sputnik. Dunyoning eng mashhur sportchilaridan biri bo‘lgan Alina Kabayeva ushbu kunlarda Toshkentda bo‘lib o‘tayotgan Badiiy gimnastika Jahon chempionati saralovchi bosqichiga sharafli mehmon sifatida tashrif buyurgan.
O‘zbekiston Gimnastika federatsiyasi matbuot xizmati xabariga ko‘ra, rossiyalik gimnastikachi “Alina Kabayeva xayriya jamg‘armasi” nomidan yosh gimnastikachi 2016-yil Olimpiya o‘yinlari ishtirokchisi, bir necha xalqaro turnirlar sovrindori, O‘zbekiston chempioni Anastasiya Serdukovaga “Badiiylik uchun” maxsus sovg‘asini topshirdi.
Eslatib o‘tamiz, Alina Kabayeva Toshketda tug‘ilib o‘sgan, shu yerda gimnastika bilan shug‘ullangan va sportdagi ilk yutuqlarini ham aynan shu yerda q o‘lga kiritgan.
Toshkentda bo‘lib o‘tayotgan Badiiy gimnastika Jahon chempionati saralovchi bosqichida dunyoning 19 mamlakatidan 90 ta eng kuchli sportchilar ishtirok etmoqda. Mehmon sportchilar Avstraliya, Armaniston, Belarussiya, Gruziya, Isroil, Indoneziya, Ispaniya, Qozog‘iston, Latviya, Rossiya, AQSh, Tailand, Ukraina, Finlyandiya, Shveysariya, Estoniya va Yaponiya davlatlaridan kelgan.
Rossiya jamoasini Rossiya Gimnastika federatsiyasi raisi Irina Viner-Usmanova boshchilik qilmoqda. Irina Viner kelib chiqishi Samarqandlik, uch marta O‘zbekiston chempioni.
