TOShKENT, 16 apr — Sputnik. O‘tgan yilning 5-oktabr kuni Shavkat Mirziyoyev Samarqandda yo‘lovchi transporti tizimini rivojlantirish maqsadida shaharda travmay yo‘llari qurish zarurligini ta’kidlagan edi.Oradan yarim yil o‘tib Samarqandda yangi yo‘lovchi transport tizimining birinchi navbati ishga tushdi.
Ikki tomonlama qatnovga mo‘ljallangan yo‘lda elektr bilan ta’minlovchi to‘rtta podstansiya va bitta depo qurildi. Temir yo‘l vokzali bilan Sartepa oralig‘idagi 6,4 kilometrlik yo‘nalishda 8 tramvay harakatlanadi.
Shavkat Mirziyoyev 15-aprel kuni Samarqandga bo‘lgan tashrifi davomida, shaharda ishga tushirilgan tramvayning birinchi yo‘lovchilari qatorida bo‘ldi. Prezident "Tarix muzeyi" bekatidan "Temir yo‘l vokzali" bekatigacha viloyat faollari bilan birga tramvayda keldi.
Kelajakda Samarqandda yana uchta yo‘nalish bo‘yicha tramvay qatnovi yo‘lga qo‘yilishi rejalashtirilgan. Tramvay yo‘llari Temir yo‘l vokzali, Siyob dehqon bozori, Kimogarlar mavzei kabi aholi ko‘p yashaydigan hududlarni shaharning eng gavjum markaziy hududlari bilan bog‘lashi kerak.
