TOShKENT, 7 apr — Sputnik. Samarqandda viloyat xotin-qizlar qo‘mitasi boshqaruvining navbatdan tashqari yig‘ilishida viloyat hokimi o‘rinbosari, xotin-qizlar qo‘mitasi raisi Nigora Rabbimova o‘z arizasiga ko‘ra lavozimidan ozod etildi, deb xabar qildi Samarqand hokimligi matbuot-xizmati.
Yig‘ilishda O‘zbekiston Respublikasi Bosh vaziri o‘rinbosari, Xotin-qizlar qo‘mitasi raisi Tanzila Norboyeva bugungi kunda xotin-qizlar qo‘mitalari zimmasiga qo‘yilayotgan vazifalar, oilalardagi ijtimoiy-ma’naviy muhitni sog‘lomlashtirishda jamoat tashkilotlari bilan hamkorlikni kuchaytirish masalalari xususida so‘z yuritgan.
"Joriy yil nomlanishidan kelib chiqqan holda xotin-qizlar qo‘mitalari tomonidan aholi bilan uchrashuvlar o‘tkazilayotir, oilalarga kirib, ulardagi ma’naviy muhitni o‘rganish, muammolarini hal etish yuzasidan tizimli ishlar olib borilmoqda, — degan T.Norboyeva o‘z so‘zi davomida. – Ammo ushbu vazifalarni yanada maqsadli tashkil etish, muammolarni chuqur o‘rganib, keyingi ishlarni tashkil qilishni belgilab olish talab etilmoqda. Oilalardagi muhitni o‘rganish asosida xotin-qizlar orasida sodir etilayotgan salbiy hodisalar sabablarini tahlil qilish hamda keng jamoatchilik bilan hamkorlikda bu muammolarga barham berish barcha qo‘mita raislarining birlamchi vazifalaridan biri sanaladi".
Tadbirda 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida belgilangan vazifalar yuzasidan xotin-qizlar qo‘mitalari oldida turgan vazifalarga alohida e’tibor qaratilgan.
