Toshkentda militsiya formasidan firibgarlik yo‘lida foydalangan shaxs qo‘lga olindi

TOShKENT, 7 apr — Sputnik. Poytaxt militsiya xodimlari militsiya formasida kvartiralar firibgarligi bilan shug‘ullangan jinoyatchini qo‘lga oldi, deb xabar qildi Toshkent shahar ichki ishlar bosh boshqarmasi rahbari o‘rinbosari Doniyor Toshxo‘jayev.

Toshxo‘jayevning so‘zlariga ko‘ra, firibgar o‘zini huquqni muhofaza qilish organi xodimi sifatida tanishtirgan, o‘zi bilan doim soxta hujjat olib yurgan, ammo formasi haqiqiy bo‘lgan. Mana shu tufayli ham hech qiyinchiliksiz o‘z o‘ljalari ishonchiga kirgan.

"Qo‘lga olingan jinoyatchi o‘zini militsiya xodimi sifatida tanishtirgan, kvartiralarni ijaraga olib, so‘ngra ularni otasining kvartirasi sifatida boshqalarga sotish bilan shug‘ullangan. U juda oddiy sxemada ish tutgan — xaridorlardan oldindan pulning bir qismini olib, izsiz g‘oyib bo‘lgan. Ayni vaqtda huquqni muhofaza qilish xodimlari firibgar qay yo‘sinda soxta hujjatni tayyorlaganini va formani qayerdan olganini o‘rganmoqda. Surishtiruv ishlari endi boshlandi, jinoiy ish uch kuncha oldin qo‘zg‘atilgan", — deb qayd etgan Toshxo‘jayev.

Oldindan olingan ma’lumotlarga ko‘ra, firibgar militsiya formasini otasidan olgan bo‘lishi mumkin. Soxta militsiya xodimining otasi ilgari ichki ishlar organlarida faoliyat yuritganligi aniqlangan. Ammo Toshxo‘jayevning so‘zlariga ko‘ra, bu shunchaki taxmin, va oldindan xulosa chiqarib bo‘lmaydi, chunki tergov jarayoni yakunlanmagan.