TOShKENT, 1 apr — Sputnik. 31 mart kuni Andijon viloyati Shahrixon tuman xalq deputatlari Kengashining sessiyasida tashkiliy masala ko‘rib chiqildi, deb xabar beradi viloyat hokimligi matbuot xizmati.
Sessiyada viloyat hokimi Shuhrat Abdurahmonov viloyatda olib borilayotgan islohotlar va uning zamirida aholi farovonligi, uning yashash tarzini yuksaltirish masalasi yotgani haqida ma’ruza qilgan.
Xabarga ko‘ra, Shahrixon tuman hokimi Odiljon Soliyev ishdan olinib, uning o‘rniga shu vaqtgacha Paxtaobod tumanini boshqarib kelgan Hikmatullo Dadaxonov tayinlangan.
Dadaxonov Hikmatullo Vahobovich 1976-yilda tug‘ilgan, 1998-yilda Andijon qishloq xo‘jalik institutini tamomlagan.
1998 yilda Andijon viloyati Izboskan tumanida chorvachilik bo‘limi ishchisi sifatida faoliyatini boshlagan Dadaxonov 2009-2015 yillarda Jalaquduq tumani hokimi o‘rinbosari, 2015-yildan boshlab esa Paxtaobod tumani hokimi sifatida faoliyat ko‘rsatgan.
