TOSHKENT, 7 mar — Sputnik. Ommaviy axborot vositalari vakillari bilan uchrashuvda Prezidentlar ushbu tashrif ikki tomonlama munosabatlarning dolzarb masalalarini muhokama etish, mintaqaviy va xalqaro ahamiyatga molik muammolar yuzasidan fikr almashish uchun qulay imkoniyat yaratganini taʼkidladilar, deb xabar qildi "Jahon" AA.
Muzokaralar ochiqlik, oʻzaro anglashuv va doʻstona ruhda oʻtgani, imzolangan hujjatlar Oʻzbekiston va Turkmaniston xalqlari manfaatlariga xizmat qilishi qayd etildi.
Ilgariroq Prezidentlar Xalqaro Axalteki otlari majmuasi bilan tanishganlari va Turkmaniston Prezidenti Mirziyoyevga zotdor ot sovgʻa qilgani haqida xabar bergan edik.
Shavkat Mirziyoyev Turkmaniston Mustaqillik monumenti poyiga gulchambar qoʻydi. Faxriy mehmonlar xiyoboniga koʻchat oʻtqazdi. Bu xiyobonga Oʻzbekistonning Birinchi Prezidenti Islom Karimov 2007-yilda koʻchat oʻtqazgan edi.
Mirziyoyev shuningdek Saparmurat Niyozov maqbarasiga gul qoʻydi. Oʻtganlarning ruhi poklariga Qurʼon tilovat qilindi.
Oʻzbekiston Respublikasi Prezidenti Shavkat Mirziyoyevning Turkmanistonga davlat tashrifi davom etmoqda.
