Samarqand viloyati sog‘liqni saqlash boshqarmasi boshlig‘i ishdan olindi

TOShKENT, 6 mar — Sputnik. 3-mart kuni Xalq deputatlari Samarqand viloyat Kengashining o‘ttiz to‘rtinchi sessiyasi bo‘lib o‘tdi, deb xabar qilingan Samarqand viloyati rasmiy saytida.

Deputatlar sessiya kun tartibi va ish tartibini tasdiqlagach, dastlab O‘zbekiston Respublikasi Oliy Majlisi Senati huzuridagi Ichki ishlar organlarining jinoyatchilikka qarshi kurashish va huquqbuzarliklar profilaktikasi borasidagi faoliyati ustidan parlament va jamoatchilik nazoratini amalga oshirish bo‘yicha komissiyaning viloyat hududiy komissiyasini tashkil etish to‘g‘risidagi masalani muhokama etdilar.

Kun tartibidagi ikkinchi masala – aholiga tibbiy xizmat ko‘rsatishni hamda dori vositalari ta’minotini yanada yaxshilash, ushbu sohadagi qonunchilikni amaliyotga samarali tatbiq etishga ko‘maklashish, shuningdek, bu sohada deputatlar va jamoatchilik nazoratini samarali amalga oshirish chora-tadbirlari ham deputatlar tomonidan qizg‘in muhokama etilgan. Bu borada ayni paytda sohada olib borilayotgan ishlar haqida dastlab viloyat hokimligi sog‘liqni saqlash boshqarmasi boshlig‘ining birinchi o‘rinbosari A.Jo‘rayev axborot bergan.

"Sessiyada tashkiliy masala ko‘rildi. Deputatlar viloyat hokimining Egamberdiyev Bahromjon Negmatovichni viloyat hokimligi sog‘liqni saqlash boshqarmasi boshlig‘i lavozimidan ozod etish haqidagi qarorini tasdiqladilar.

Sessiyada muhokama etilgan masalalar yuzasidan viloyat Kengashining qarorlari qabul qilindi", deyiladi xabarda.