TOShKENT, 9 fev — Sputnik. O‘zbekistonda Sirojbek Abdullayev tomonidan suratga olingan "Daydi" filmini reklama qilishda bir qator qonunbuzilish holatlari kuzatilgani sababli kinoteatrlarda mazkur film taqdimotini o‘tkazish va keng namoyish qilish to‘xtatib turiladi. Bu haqda "O‘zbekkino" Milliy agentligi tomonidan berilgan rasmiy bildirishga tayanib, uz24.uz xabar qilmoqda.
Xabarda aytilishicha, ijtimoiy tarmoqlarda milliy kinematografiya sohasida tarqatilayotgan axborotlar "O‘zbekkino" Milliy agentligi tomonidan monitoring qilinganda "Timur Film" MChJ tomonidan suratga olingan "Daydi" nomli badiiy filmni jamoatchilik orasida targ‘ibot qilishda bir qator qonunbuzilishi holatlariga yo‘l qo‘yilganligi aniqlangan.
Jumladan, mazkur filmning treyleri, bannerlari va chiptalari chiqarilib, ularda Gollivud yulduzi Morgan Frimanning 2014-yilda ishlab chiqarilgan "So‘nggi ritsarlar" filmida suratga tushgan qiyofasi aks ettirilgan. Ammo aktorning qiyofasi filmning agentlikka taqdim etilgan nusxasida bo‘lmagan.
"Timur Film" MChJ tomoshabinlarning filmga nisbatan talabini kuchaytirishga erishish maqsadida mashhur kino yulduzini filmda suratga tushganligini bildiruvchi yolg‘on (chalg‘ituvchi) ma’lumotlar tarqatib, iste’molchilarning (tomoshabinlar) huquqlarini poymol qilgan.
Bu holat filmga nisbatan yuqori qiziqishni uyg‘otib, uni tomosha qilishga bo‘lgan talabning sun’iy ravishda oshishiga sabab bo‘lmoqda.
Shuningdek, "Timur Film" MChJ studiyasi "Daydi" filmida bir qator xorijiy filmlardagi kadrlardan foydalanib, O‘zbekiston Respublikasining "Mualliflik huquqi va turdosh huquqlar to‘g‘risida"gi Qonuni 19-moddasi talabini ham buzgan. Qonunning ushbu moddasiga ko‘ra, yuridik va jismoniy shaxslar muayan asardan faqat huquq egasi yoki boshqa vakolatli shaxs bilan tuzilgan shartnomaga binoan foydalanishlari mumkinligi belgilangan.
Shulardan kelib chiqib, ushbu holatlar bo‘yicha Xususiylashtirish, monopoliyadan chiqarish va raqobatni rivojlantirish davlat qo‘mitasiga hamda Intellektual mulk agentligiga rasmiy taqdimnoma kiritildi.
Qayd etilgan masalalar mazkur davlat idoralari tomonidan ko‘rib chiqilguniga qadar "Daydi" filmini kinoteatrlarda taqdimotini o‘tkazish va keng namoyish qilishni to‘xtatib turish ko‘rsatmasi berildi.
Ushbu xabar ijtimoiy tarmoqlarda ham muhokamaga sabab bo‘lmoqda. Abdurashid Mamadolimov ismli foydalanuvchi bu holatga o‘z fikrini bildirar ekan, film namoyishining to‘xtatilishi juda to‘g‘ri qaror bo‘lganligini ta’kidlagan.
"Yangi bir o‘zbek kinosi namoyishini to‘xtatib qo‘yishibdi. Sababi film reklama bannerida mashxur bir Hollivud aktorining surati bor ekan. Lekin bu aktor filmda rol o‘ynamagan. Juda to‘g‘ri qaror qilinibdi. Film yaratuvchilari qanday uyalmasdan bunaqa ko‘zbo‘yamachilik qilishgan!?", deb yozadi u.
Uning fikricha, o‘zbek tv kanallarida ham shunga o‘xshash holatlar mavjud.
"MTV Shou" degan ko‘rsatuv bor. Ko‘rsatuvni ko‘ngilochar (yengil) deb qarasak, yomon emas. Lekin men bu ko‘rsatuvning kamida ikkita sonida yuqoridagi kabi holatga duch keldim. Masalan bittasi Mirzabek Xolmedov mehmon bo‘lgan soni. Unda go‘yoki mashhur g‘arb aktori Holmedov to‘g‘risida gapiradi. Tushunarliki, bu yerda o‘sha mashhur aktorning butunlay boshqa gaplari o‘zbekchada o‘zgartirib dublyaj-montaj qilingan. Bu borib turgan ko‘zbo‘yamachilik, muallif huquqining buzilishidir. TV kanal uchun bunday ishni qilish uyat", deb fikrini yakunlaydi u.
