TOSHKENT, 17 yanv — Sputnik. Hindiston eksport maqsadida Oʻzbekistonda moshning yangi turini yetishtirish taklifi bilan chiqdi, deb xabar berdi "Oʻzagroeksport" tashqi savdo kompaniyasi.
Oʻtgan yili "Oʻzagroeksport" AJ Hindistonning Shri Niwas Dall And Besan Mill, Green Field Agro, Avika Foods va Eco Green Import&Export kompaniyalari bilan mosh yetkazib berish boʻyicha shartnoma imzolagandi.
Mahsulot asosan Namangan, Samarqand, Surxondaryo, Toshkent, Fargʻona va Xorazm viloyatlari tomonidan yuklanmoqda.
Joriy yilning yanvar oyi birinchi oʻn kunligida "Oʻzagroeksport" AJ Hindistonga 300 tonnadan ortiq mosh eksport qildi. Kompaniya oy oxirigacha yana 2 ming tonna mosh eksport qilishni rejalashtirmoqda.
Eslatib oʻtamiz, Oʻzbekistonda 2016 yilda meva-sabzavot mahsulotlari eksporti 2015 yildagiga nisbatan 38,3% — 818,5 ming tonnagacha oshdi. Xususan, 120,2 ming tonna dukkakli ekin mahsulotlari eksport qilingan.
