TOShKENT, 17 yanv — Sputnik. O‘zbekiston maxsus xizmatlari Istanbulda yangi yil tunida terrorchilik harakatini sodir etishda gumonlanib qo‘lga olingan shaxs bilan bog‘liq vaziyatni o‘rganishmoqda, hozircha Istanbuldan rasmiy ma’lumot kelib tushmadi.
"Istanbulda qo‘lga olingan shaxs borasidagi holat monitoring qilinmoqda, lekin ayni paytga qadar turk tomonidan rasmiy hujjatlar kelgani yo‘q", — dedi suhbatdosh. Uning aytishicha, qo‘lga olingan shaxsning fuqaroligi haqida gapirishga hali erta.
Sal oldin Turkiya Bosh vaziri Binoli Yildirim Istanbulda terrorchining qo‘lga olingani haqida xabar qilgan edi.
Istanbul gubernatori Vasip Shaxin o‘zbekistonlik Abdulqodir Masharipov o‘z aybiga iqror bo‘ldi, deb ma’lum qildi, deya xabar berdi RIA Novosti.
Shaxinning aytishicha, u 1983 yilda O‘zbekistonda tug‘ilgan, 4ta tilni biladi, Afg‘onistonda mashg‘ulot o‘tagan, u — puxta tayyorgarlik ko‘rgan terrorchi. Taxminan, 2016-yilning yanvarida Turkiyaga kirib kelgan. Shundan so‘ng, Istanbulga kelib, kvartira ijaraga olgan, terakt sodir etishdan oldin esa turar-joyini tez-tez o‘zgartirib turgan.
Uning so‘zlariga ko‘ra, Masharipov terrorchilik uyushmalari bilan aloqador bo‘lishi mumkin. U bilan birgalikda uch nafar ayol va iroqlik erkak qo‘lga olingan.
Eslatib o‘tamiz, Istanbuldagi Reina tungi klubiga Yangi yil oqshomida qurolli hujum uyushtirilgan. Kalashnikov avtomati bilan qurollangan terrorchi klubni qo‘riqlayotgan politsiyachini otib o‘ldirgan va klubdagi odamlarga qarata o‘t ochgan. Turkiya IIV ma’lumotlariga muvofiq, ushbu terakt oqibatida 39 kishi halok bo‘lgan, 69 nafar shaxs yaralangan. Reyter agentligi esa "Islom davlati" terrorchilik uyushmasi ushbu terakt uchun javobgarlikni o‘z bo‘yniga olganligini xabar qilgan edi.
