Shov-shuv: 4-dekabr kuni O‘zbekistonga kirish chiqish ta’qiqlanadi

TOShKENT, 30 noya — Sputnik. Toshkentdagi International Hotel Tashkent mehmonxonasida O‘zbekiston Respublikasi Prezident saylovi jarayonini yoritish bo‘yicha "Press-klub Elections.uz-2016" o‘z faoliyatini boshladi, deb xabar qiladi "Darakchi" nashri.

Xabarda ta’kidlanishicha, press-klubning birinchi ish kuni doirasida O‘zbekiston Respublikasi Oliy Majlisi senati raisi o‘rinbosari Svetlana Ortiqova, O‘zbekiston Respublikasi Adliya vaziri Muzraf Ikromov, Demokratiya va inson huquqlari instituti direktori Sayyora Xo‘jayeva, FJShMQMI eksperti Dilafruz So‘fiyevalar ishtirokida jurnalistlar bilan uchrashuv bo‘lib o‘tkazgan.

Xususan, jurnalistlar tomonidan so‘nggi vaqtlarda ayrim ijtimoiy tarmoqlarda tarqalayotgan O‘zbekistonga 4-dekabr O‘zbekiston Prezidenti saylovi kuni kirish va chiqishda cheklovlar o‘rnatilishi xususidagi mish-mishlar yuzasidan ekspertlarga savol bilan murojaat qilingan.

Bu haqda O‘zbekiston Respublikasi Adliya vaziri Muzraf Ikromov quyidagicha javob bergan: "Ortiqcha shov-shuvlar uchun hech qanday asos yo‘q. 4-dekabr kuni mamlakatimiz hududida jamoat transportining barcha turlari odatdagi tartibda ishlaydi. O‘zbekistonga kirish va chiqishda ham hech qanday cheklovlar ko‘zda tutilmagan".