TOShKENT, 7 noya — Sputnik. "O‘zbekiston adabiyoti og‘ir judolikka uchradi. Kuni kecha xalqimiz o‘zining yana bir ulug‘ farzandidan ajradi", — deb so‘z yozdi o‘zining Instagrammdagi sahifasida Lola Karimova.
"Abdulla Oripov bizning g‘ururimiz, fahrimiz edilar. Bu insonning she’rlari bilan katta bo‘ldik, ulg‘aydik, tarbiya oldik. Yoshligimizdan bizni ezgulik tomon o‘z she’rlari bilan yetaklab borgan sevimli shoirimiz edilar.
Shoirning "Xayr endi", "Yolg‘izlik", "Savob", "Qassam darra", "Onajonim", "Dunyoni qizg‘anma", "Sen Pushkinning sevgan malagi…", "Bahor" kabi she’rlari, "Jannatga yo‘l" kabi poemalari xalqimiz qalbini abadul abad zabt etdi", — deb so‘zini davom ettirdi Lola Karimova.
Shoirning o‘zbek adabiyotida tutgan o‘rnini yuqori baholab, Lola Karimova "U zamonamizning Navoiysi, Abdulla Qodiriysi edi. Abdulla akaning oilalariga chuqur ta’ziyamizni bildiramiz. Joylari jannatdan bo‘lsin. Ohiratlarini mehribon Parvardigor obod qilsin", — deb so‘zini yakunladi.
Abdullar Oripov nafaqat o‘zbek shoiri balkim O‘zbekiston birinchi prezidenti Islom Karimovning yaqin do‘sti edi. Islom Karimov vafot etganda u shunday satrlar yozgan edi: "Kimdir yo‘lboshchidan ayrildik dedi, Men-chi, aziz do‘stdan ayrilib qoldim."
