TOShKENT, 1 noya — Sputnik. O‘zbekiston Tashqi ishlari vaziri Abdulaziz Kamilov Hindistonlik hamkasabasi Mubashir Djaved Akbar boshchiligidagi delegatsiyani qabul qildi, deb xabar qilmoqda TIV matbuot xizmati.
Uchrashuv boshida O‘zbekiston TIV rahbari Hindiston rahbariyatiga O‘zbekiston birinchi prezidenti Islom Karimov vafoti munosabati bilan bildirgan hamdardligi va Samarqandda u kishining qabrini ziyorat qilgani uchun minnatdorchilik bildirdi.
Bo‘lib o‘tgan suhbatda, tomonlar O‘zbekiston va Hindistonning siyosiy-diplomatik, savdo-iqtisodiy, madaniy-gumanitar va boshqa sohalardagi hamkorlik masalalari hamda hududiy va xalqaro maydondagi voqealar borasida fikr almashishdi.
Uchrashuvda O‘zbekiston va Hindistonning yuqori doiralari va oliy rahbariyati orasida doimiy ravishda olib borilayotgan siyosiy muloqoti, ishbilarmonlar hamda madaniyat va san’at sohalari vakillari uchrashuvlari, oldin erishilgan kelishuvlarni ro‘yobga chiqarish, mamlakatlarimiz va xalqlarimiz orasida ko‘p qirrali hamkorlikni yo‘lga qo‘yish imkonini berayotgani e’tirof etildi.
Uchrashuvda, shuningdek, Hindistonning O‘zbekistondagi elchisi Vinod Kumar ham ishtirok etdi.
