TOShKENT, 3 sent – Sputnik. Moskvadagi “Polyanka” metro bekatidan chiqar ekansiz, har qadamda qo‘llarida gul va guldastalar ko‘targan mayus insonlarga – turli millatga mansub keksayu yosh, erkagu ayolga ko‘zingiz tushadi. Ularning hammasi bir yo‘nalishda – Prezident Islom Karimovning xotirasiga hurmat bajo keltirish niyatida O‘zbekiston Respublikasining Rossiyadagi elchixonasi tomon yo‘l olishgan.
Elchixona binosi yoniga kelganlar O‘zbekistonning birinchi Prezidenti Islom Karimovni xotirlab gullar, guldastalar, o‘z hurmati izhor etilgan bitiklarni qo‘ydilar. Prezidentni xotirlash uchun kelganlarning yuzlarida g‘amginlik va qayg‘u ifodasini, ko‘zlarida esa yoshni ko‘rish mumkin edi.
“Prezidentimiz tinchlik ramzi edilar. Tinchlik-osoyishtalik deganda Islom Karimov, Islom Karimov deganda tinchlik-osoyishtalik ko‘z oldimizga kelar edi. Prezidentimizga ishonganimiz uchun ham farzandlarimizdan ko‘nglimiz to‘q bo‘lib xorijda yurardik”,-deydi samarqandlik Oydin Sharapova.
“Biror so‘z deya olmayman. Prezidentimizning joylari jannatdan bo‘lsin”,-deya ko‘ziga yosh oladi buxorolik Muharram Rahmonova.
Elchixona oldidagi maydonda Islom Karimovni xotirlab jamlanganlar Prezidentning hayot yo‘li, O‘zbekiston Respublikasi mustaqilligi va taraqqiyotida tutgan o‘rni haqida to‘lqinlanib gapirdilar.
Prezident xotirasiga hurmat bajo keltirish niyatida elchixonaga oshiqayotganlarning safi uzilmayapti.
