TOShKENT, 15-iyul — Sputnik. Fransiyaning Nissa shahrida 84 kishining umriga zomin bo‘lgan mudhish terrorchilik, O‘zbekiston aholisini befarq qoldirmadi. Toshkentliklar erta tongdan Fransiya elchixonasi oldiga gullar olib kelmoqda.
Elchixona ijtimoiy tarmoqdagi sahifasida Fransiya xalqi nomiga ko‘pchilik chin ko‘ngildan aytilgan hamdardlik so‘zlarini yozib qoldirmoqda.
“Sodir bo‘lgan mudhish fojea yuzasidan bizning hamdardligimizni qabul qiling. Terrorchilik doimo ablah, surbet va g‘ayriinsoniy bo‘lgan. Fransiya xalqi bilan birgalikda qurbonlar ruhiga uchun duo qilamiz”, — deb yozadi foydalanuvchilardan biri.
“Bugun ertalab yangiliklardan bildim. Videolavhani ko‘rib…, nima deyishimni ham bilmay qoldim… Dunyo bularning barchasidan charchadi” – deb izoh bergan boshqa bir foydalanuvchi.
Eslatib o‘tamiz, kecha payshanba kuni kechqurun, Nissadagi Angliya qirg‘og‘ida terrorchi yuk avtomobilini mushakbozlikni tomosha qilishga jamlangan odamlar ustiga haydagan. Fojeada 84 kishi qurboni bo‘lgan va 200 kishi jarohatlangan edi.
Guvohlar aytishiga qaraganda, yuk avtomobili ikki kilometr davomida zig-zagsimon yurib odamlarni bosgan. Undan tashqari terrorchi odamlarga qarata o‘q otgan. Politsiya uni yo‘q qilgan.
O‘zbekistonning Parijdagi elchixonasi ayni damda Fransiya qutqaruv xizmatlari bilan aloqada bo‘lib Nissada O‘zbekiston fuqarolari haqidagi ma’lumotlarni aniqlamoqda.
