TOShKENT, 31 mar — Sputnik. Islom Karimovning kenja qizi Lola Karimova-Tillayeva bir yildan buyon Instagram ijtimoiy tarmog‘ida o‘z sahifasini yuritayotgani haqida xabar qildi va sal keyinroq o‘z kuzatuvchilari savollariga javob berishga va’da berdi.
"Aziz do‘stlar, Instagramdagi sahifam ochilganiga mana bir yil ham bo‘libdi. Menga nisbatan bo‘lgan samimiy munosabatingiz, e’tiboringiz va qiziqishingiz uchun sizlarga o‘z minnatdorchiligimni izhor etmoqchiman.
Shahsiy sahifamni yuritish men uchun biroz qiyinroq kechadi deb tahmin qilgan edim, axir men bu yerda ichki kechinmalarim, fikrlarim, faoliyatimdagi muhim voqealar hamda men uchun eng aziz bo‘lgan insonlar — oila a’zolarimning suratlari bilan o‘rtoqlashaman.
Menga yo‘llayotgan savollaringiz uchun tashakkur, azizlar. Barcha savollarga javob yozishga vaqt topaolmasam-da, eng qiziqarlilarini keyinroq batafsilroq javob yozish uchun inobatga olib qo‘yganman. Yana bir bora barchangizga tashakkur!!!”, — deya izoh bergan Lola Karimova Samarqanddagi Registon maydonida tushgan surati tagida.
