TOShKENT, 9 fev — Sputnik. Suriyaliklar ahvolini o‘rganuvchi Siege Watch nodavlat tashkiloti bayonotida shu kechayu-kunduzda Suriya hududi bo‘ylab milliondan ortiq kishi qamalda yashab kelayotgani ta’kidlanmoqda.
"Siege Watch tashkiloti tomonidan e’lon qilingan yangi ma’lumotlarga ko‘ra, ayni vaqtda Suriyaning Damashq, Rif-Damashq, Dayr-az-Zo‘r, Xoms va Idlib singari tumanlarida milliondan ziyod kishi qamalda yashab kelyapti”, — deyiladi tashkilot saytida e’lon qilingan bayonotda.
2011 yilning mart oyida Suriyada boshlangan qurollangan mojaro hanuzga qadar davom etmoqda. Bunda hukumat askarlari turli terrorchilik uyushmalariga qarshi kurashib kelmoqda.
BMT ma’lumotlariga ko‘ra, Suriyadagi urush natijasida 220 mingdan ziyod inson halok bo‘lgan.
2015 yilning 30-sentabridan boshlab, Rossiya davlati Suriya prezidenti Bashar Asadning rasmiy talabiga binoan “ID” va “Jabhat an-Nusra” singari terrorchilik uyushmalariga tegishli obyektlar ustidan aviazarbalarni amalga oshirib kelmoqda.
