O‘tgan haftada Toshkentda “Dunyo xalqlari qo‘g‘irchoqlari” loyihasi doirasida “O‘zbek qo‘g‘irchoqlari” ko‘rgazmasi tashkil etildi. Qo‘g‘irchoqlar libosi, ornamenti va bezaklari ustida nafaqat liboslar dizayneri, balki tarixchilar, kulollar va zargarlar ish olib borishgan.
Hunarmandlar milliy qo‘g‘irchoqlar yordamida o‘zbek milliy liboslari xilma-xilligini, rassomchilik san’atini, matolar fakturasi hamda zargarlar mahoratini ko‘rsatib berishmoqda.
So‘nggi yillarda interyer bezagida g‘arbdan kirib kelgan ergonomik va xay-tek usullaridan foydalanishdan biroz zerikkan dizaynerlar milliy estetika, sharq simvolikasiga murojaat qila boshladilar. Bugungi kunda uy va ofislarga bezak berishda – milliy qo‘g‘irchoqlardan foydalanish urf bo‘lmoqda.
Chet elliklar, qolaversa, o‘zbekistonliklar ham ushbu, qo‘l mehnati bilan yaratilgan mo‘jaz qo‘g‘irchoqlarni bajonidil xarid qilishmoqda. Aytgancha, interyer bezagi uchun yaratilgan milliy qo‘g‘irchoqlar 30 dollardan 2000 dollargacha baholanadi.
O‘zbekistonning har bir regioni o‘z qo‘g‘irchog‘iga ega. Ular aksariyat hollarda o‘z liboslari bilan farqlanadilar, xolos.
San’atshunoslarning ta’kidiga ko‘ra, hozirda milliy liboslar urf bo‘lgani, qolaversa, interyerda ham milliy motivlarga ko‘proq urg‘u berilayotgani bois, milliy stilistika asosida yaratilgan qo‘g‘irchoqlar ko‘paymoqda.
Qo‘g‘irchoqlarni yasash uchun — tosh, sopol, shisha, yarim qimmatbaho toshlar va yog‘ochdan foydalanilmoqda.
Qiziqarli faktlardan biri — har bir qo‘g‘irchoq boshqa hech qayerda takrorlanmaydigan original yuz tuzilishiga ega.
