"Suriya mening Vatanim. U menga onam singari aziz. Onamning boshiga kulfat tushganida, u ogʻriganida, men albatta, uning yonida boʻlmogʻim shart. Hozir Suriya ogʻir kunlarni boshdan kechirmoqda. Shu bois, men u bilan, uning yonida boʻlishim kerak. Avvalgidek, osoyishta hayot kechira olishim uchun uni davolashim kerak. Bu mening birinchi galdagi vazifam, — deydi ayollar bataloni aʼzolaridan biri.
Suriya davlat qoʻshinlari maxsus ayollar batalonida bugun 800 ga yaqin ayollar xizmat qilmoqda. Sharq goʻzallari 2013 yildan buyon shaharlarda patrul xizmatida. Ular nazorat-oʻtkazuv punktlari xavfsizligini taʼminlashmoqda.
Damashqdagi ayollar akademiyasi kursantlari erkaklar bilan bir qatorda jangovar tayyorgarliklar olib borishadi. Ularga miltiqdan oʻq uzish va granata uloqtirish sir-asrorlari oʻrgatiladi.
Suriya Qurolli Kuchlari safiga jasur va davlatning hozirgi tartibiga sodiq ayollargina qabul qilinadi.
Suriya armiyasining maxsus ayollar bataloni – dunyodagi eng yosh armiyalardan biri hisoblanadi. Suriya prezidenti Bashar Asad koʻngilli askar-ayollarga 2013 yilda armiya safiga qoʻshilishga ruxsat berdi. Prezident mamlakatdagi qurolli kuchlar sonini saqlab qolish maqsadida shunday qarorni qabul qildi.
Suriyada 2011 yilning mart oyi boshlangan qurolli mojaro hanuzgacha davom etmoqda. Bunda qurollangan terror uyushmalari (“Islom davlati” va “Jabhat an-Nusra” ekstremistik guruhi jangarilari) davlat armiyasi askarlariga qarshi kurashib kelmoqda. BMT maʼlumotlariga koʻra, qonli toʻqnashuvlar 250 ming kishi hayotiga zomin boʻlgan.
